Вітальная Тамашу Зану

Хто даў нам прыклад
Шчырай даброці,
Хто даў узор, як жыць мы павінны?
Хто маладыя сэрцы захвоціў
Стаць на шлях цноты, шлях беспахібны?

Хор:
Прыкладны майстар,
Прыкладны майстар,
Прыкладны майстар, хвала Табе!

Хто за парывы чыстыя сэрца
Незразуметы мусіў навонкі
З’ехаць надоўга, як паняверца,
У край чужынскі з роднай старонкі?

Бедны выгнанец,
Бедны выгнанец,
Бедны выгнанец, хвала Табе!

Ён прад Суддзёй стаіць і бязвінна
Вернецца на жыццёвае свята –
Прыме Айчына роднага Сына,
А свет вучоны – мудрага брата.

Светлы герой наш,
Светлы герой наш,
Светлы герой наш, хвала Табе!

Хто ўдзячным словам, спевам пяшчоты
Вучыць кахаць жанчын міладайна,
Хто славіць вернасць, юныя цноты,
Кліча ў іх бачыць Божыя тайны?

Чулы паэце,
Чулы паэце,
Чулы паэце, хвала Табе!

Хто ў свеце лжывым здолеў жыць свята
І не запляміў дух свой спакусай,
Хто ў незычліўцы змог бачыць брата,
Хто спадкаемца праўды Ісуса? –

Чыстае сэрца,
Чыстае сэрца,
Чыстае сэрца, хвала Табе!