Філарэцкая песня

Прэч ад нас, прэч, смутку хмары!
Лепш падымем хмелю чары
Вышай голаў, хай вясёла
Тут ляціць наш час!
Ці памогуць нараканні?
Нашы ўперадзе світанні!
Добрым людзям добра будзе –
Сонца стрэне нас.

Добрым доля хай спрыяе,
А ліхіх хай Бог карае.
Хто пачцівы, той шчаслівы,
Той на вышыні.
З намі будуць нашы леты –
Віват, брацці-філарэты!
Сцерпім мужна з песняй дружнай
Мы няволі дні.

Далівай жа чары, Стасе,
Часу шмат яшчэ ў запасе.
Гэй, аддана п’ем за Зана –
Віват Тамаш Зан!
Ёсць яшчэ на свеце цнота,
Хто ж больш годны за Чачота?
П’ем за Яна ўсе з пашанай,
Віват Чачот Ян!

За Міцкевіча здароўе –
Хай нас тут усцешыць зноў ён.
Нам надзеі ўсім навее
Боскай лютні гук.
Зноўку нашы ўскінем шклянкі –
П’ем за вас цяпер, каханкі!
Шмат губляе, хто не знае
Ласкі мілых рук.

Пасядзім яшчэ паўхвілі –
Тост жа мы адзін забылі.
Зноўку нашы ўскінем чашы –
Віват вам і мне!
Спаражнілі чары ўсе мы,
Ну а з імі й вершаў тэмы.
Ды і вершам не завершым
Мы гамонку, не.