Песні і гімны 1-й паловы XX ст.
Гімны эпохі барацьбы за дзяржаўнасць
У пачатку XX стагоддзя беларускі нацыянальна-дэмакратычны рух быў у пошуках гімна. Найбольш папулярнымі былі «Беларуская марсельеза» («Ад веку мы спалі») на словы Аляксандра Мікульчыка і «А хто там ідзе?» на словы Янкі Купалы. Менавіта гэтыя два гімны выконваліся на Усебеларускім з’ездзе 1917 года ў Менску, вынікам з’езда стала далейшае абвяшчэнне Беларускай Народнай Рэспублікі. У канцы 1919 года быў прадстаўлены гімн «Мы выйдзем шчыльнымі радамі» (словы Макара Краўцова, музыка Уладзіміра Тэраўскага), які стаў гімнам беларускага нацыянальнага руху ў эміграцыі, таксама папулярны ў Заходняй Беларусі міжваеннага перыяду. У 1947 годзе Мікола Равенскі паклаў музыку на верш Наталлі Арсенневай «Магутны Божа», ён лічыцца духоўным гімнам Беларусі.
У 2018 годзе, да 100-годдзя з дня абвяшчэння незалежнасці Беларускай Народнай Рэспублікі, быў падрыхтаваны Спеўны сход на тэму беларускіх гімнаў.
Уладзімір Тэраўскі, Мікола Равенскі і Мікола Куліковіч (Шчаглоў), творчасць якіх прадстаўлена на «Спеўным сходзе», – знакавыя постаці айчыннай культуры, стваральнікі нацыянальнага кірунку ў беларускай музыцы. Іх лёсы склаліся няпроста. Уладзімір Тэраўскі быў расстраляны бальшавіцкімі ўладамі, Равенскі і Куліковіч пайшлі ў вечны спачын на чужыне. Але іх культурная спадчына стала падмуркам, на якім паўстала незалежная Беларусь.